BAGUIO CITY – Umap-apela ti maysa a grupo dagiti pony boys sadiay Wright Park iti tulong manipud iti lokal a gobyerno ti Baguio City ken kadagiti umili kasaruno ti panaka-apektar manen dagitoy iti baro ken nairtengan a pagalagadan kontra iti COVID-19.
Sigun kenni Darwin Alquizar, Officer-In-Charge ti Wright Park Pony Boys Association, kimmaro manen ti sitwasyonda ita gapu iti nairtengan a restrictions ti siudad, partikular ti saan a panakaipalubos nga agturong ditoy dagiti turtista malaksid pay iti napasaran a panagtudtudo kadagiti napalpalabas a lawas.
Kinunana nga idi kalman ket dua laeng a grupo ti nagbalin a kustomer dagitoy.
Dinakamatna nga agluklukatda uray awan dagiti turista nga agturturong sadiay gaputa dakkel ti namnamada nga adda latta ti agturong nga umili sadiay Wright Park.
Gapu iti daytoy, kiniddaw ni Alquizar ti suporta dagiti umili babaen iti panagturongda sadiay Wright Park tapno padasenda nga aglugan kadagiti kabalyo.
Imbinglayna pay nga ar-aramiden met dagiti pony boys ti kabaelanda tapnu adda ti mabusbusna iti pagkasapulan ti pamilyada kas iti panagaramid ti abono ken dadduma pay.
