BAGUIO CITY – Inkari ni Ifugao Representative Teddy Brawner Baguilat Jr. ti panangipaayna iti tulong para iti panggep a kiddaw tapnu maideklara a public land dagiti inabandona dagiti mining companies iti probinsia ti Benguet.
Sigun kenkuana, kasapulan ti linteg para iti daytoy isut gapuna a nakasagana met a mangisakad iti kiddaw iti Kongreso.
Kinunana a pampanunutenda met ita no anya ti tulong a maipaayda kadagiti apektado a pamilya sadiay Barangay Ucab nga agawid sadiay Ifugao, pakairamanan dagiti agbati ditoy Benguet.
Dinakamatna a pumigpigsa ti panagmula sadiay Ifugao ngem agtaltalinaed a parikutda dagiti kalsada kas sadiay Hingyon ken Banaue nga adu paylaeng dagiti barangay a saan a napintas ti kalsadada.
Innayonna nga uray agawid dagiti apektado a pamilya ken agmulada ket nasken latta a mapasayaat dagiti kalsada babaen iti tulong ti Department of Agriculture.
