BAGUIO CITY – Tumulong ti Mines and Geosciences Bureau (MGB) – Cordillera tapnu makatungpal dagiti small-scale miners sadiay Abra kadagiti kasapulan a dokumento para iti aplikasyonda iti Minahang Bayan.
Inkari daytoy ni MGB-Cordillera regional director Fay Apil iti panakitaripnongna iti Provincial Mining Regulatory Board (PMRB) ti Abra ken dagiti minero sadiay.
Maitunos daytoy iti tarigagay ti PMRB-Abra a ma-regulate ti panagminas ken pagbatuan ken panagdarat iti nasao a probinsia tapnu masalwadan ti nakaparsua-an.
Naituding met a kapatang ti Environment and Natural Resources Office ti Abra dagiti minero sadiay mainaig kadagiti kasapulanda a sertipikasyon ken dokumento manipud kadagiti maseknan nga ahensia bayat nga isayangkat ti maysa a non-government organization ti capability training kadagiti agaplikar a minero tapnu maiyunay-unay kadagitoy ti responsable a panagminas.
Naamuan nga addan ti pito nga aplikasyon sadiay Abra para iti Minahang Bayan, partikular sadiay Dumagas, Boliney; San Ramon East, Manabo; ken Nalbuan, Ag-aguet, Mapisla ken Capcapo sadiay Licuan-Baay.
