BAGUIO CITY – Naiturongen sadiay Manila dagiti tultulang a mapapati a 1,000 years old a nakali sadiay San Pedro, Rizal,Kalinga.
Segun kenni Myla Dipalog, tourism officer ti Rizal, maipasidong iti panagadal dagiti nasao a tulang a manipud kadagiti banyas, rhinoceros, elepante ken artifacts.
Kinuna ni Dipalog nga iti kanito a maamoan ti specia dagiti nasao a fossil ket isubli met laeng dagitoy ti excavating team nga idadauloan ni French Ambassador to the Philippine Thierry Mathou ken Philippine National Museum Director Jeremy Barns.
Naipatungpal ti panagkali iti historial Elephant Hill, maysa kadagiti mabigbigbig nga archeological research site iti nasao nga ili kalpasan nga immunan a nakali sadiay dagiti tulang ti rhinoceros idi 2014.
Kinuna pay ni Dipalog nga inkari ni Mathou nga agsublida iti nasao a lugar inton sumaruno a tawen para iti kanayunan a panagkali ken panagadal iti kanito a maaddaanda iti pondo.
