Aw-awagan ni Johnny Maymaya Sr., Chairman ti Kalinga Bodong Council of Elders dagiti turista a saan nga agbuteng nga agpasyar kadagiti tourist destinations iti probinsya ti Kalinga.
Daytoy ket kasaruno paylaeng ti agwarwaras iti social media a tribal war sadiay itay laeng nabiit.
Iti pannakiuman ti Bombo Radyo kenkuana, kinunana nga awan ti pagbutngan dagiti turista gapu ta awan ti mapaspasamak a tribal war sadiay.
Nupay kasta, inaklonna nga adda dagiti napasamak a sumagmamano a pammaltog gapu iti saan a nagkikinaawatan dagiti agtutubo bayat ti panag-inumda ti arak rason a nangitunda iti pammaltog.
Gapu iti daytoy, nagbales met ti bangir a tribu rason nangitunda iti pammaltog a nakadangran ti maysa nga indibidual.
Iti baet dayta, dagus metlaeng a simmuko ti suspek kalpasan a naipaayan daytoy iti warrant of arrest kasta metten a simmuko metlaeng dagiti dadduma pay a suspek iti maikadua a napasamak a pammaltog.
Innayon pay ni Maymaya a nasaysaayat no agdamag iti maseknan nga otoridad sadiay tapno maamuan ti pudpudno a napasamak.
Impaganetgetna metlaeng kadagiti umili iti nasao a probinsya a liklikan iti panangipablaak kadagiti saan a pudpudno a banag tapno saan a maalarma ti publiko.
Maipalagip metlaeng nga immunan a nagpalagip ni PCapt. Ruff Manganip, pannakangiwat ti Kalinga Police Provincial Office kadagiti umili sadiay a liklikan ti panangiblaak kadagiti fake news.
Iti agdama, naannayas ken natalna ti peace and order iti nasao a probinsya.
