BAGUIO CITY – Manamnama a sumangbay iti siyudad ti Baguio dagiti turista manipud San Fernando, La Union mangrugi inton Mayo 20 iti agdama a tawen.
Kasaruno daytoy ti panagpinirma iti katulagan ti Baguio City ken San Fernando City para iti panakailukat ti turismo iti nagbaetan ti dua a siyudad.
Iti panakiuman ti Bombo Radyo Baguio, inlawlawag ni City Administrator Bonifacio dela Peña a nataltalged dagiti turista manipud San Fernando City gapu ta istrikto ti implementasyon ti health protocols sadiay.
Impanamnamana met a mailukat ti turismo iti dadduma pay a lugar malaksid laeng kadagiti naipasidong iti Enhanced Community Quarantine apaman a maobserbaran a napintas ti pagbanagan ti Baguio City ken San Fernando Bubble.
Impakaawat ni dela Peña a nasken a mailukat ti turismo gapu ta makatulong daytoy iti ekonomiya.
