Nagpalagip ti La Trinidad Municipal Police Station kadagiti amin a turista ken lokal a residente a drop and go ti rumbeng a maipatungpal kadagiti lugan sadiay Stobosa, La Trinidad.
Iti panakiuman ti Bombo Radyo kenni Police Captain Roland Salingsing, Operation Officer ti La Trinidad Municipal Police Station, kinunana a ti nasao a tourist destination ket awanan iti espasyo a mabalin a pagparadaan rason a drop and go ti maipatpatungpal.
Daytoy ket tapno, saan a mangitunda iti nailet a gunay ti trapiko nangruna ket manarimaan ti road construction kadagiti kalsada manipud Km. 3 agingga Km.5 sadiay La Trinidad.
Sigun kenni Police Captain Salingsing, adda met ti maideploy a police personnel iti nasao a lugar kasta met ti police assistance desk a mabalin a pagdamagan ti publiko.
Maipalagip a ti Stobosa wenno ti Valley of colors ket maysa a pagpasyaran a daydayoen dagiti lokal a residente ken turista gapu kadagiti pagtaengan a napintoraan a mangipakpakita iti maysa nga artwork.