BAGUIO CITY–Nakemmeg ti maysa a turista gapu iti panagtakawna iti maysa a nginginaen a kallugong iti uneg ti kadakkelan a mall ditoy siudad ti Baguio idi kanikadua.
Nabigbig daytoy a ni Breyan Oclerit Casiňo, 40-anyos ken residente ti Aplaya, Sta Rosa, Laguna.
Maibasar iti report, nakita ti maseknan a gwardiya ti panagala ti suspek iti nasao a kallugong nga aggatad iti nasurok P10,000 manipud iti display shelves.
Kalpasanna, nakita ti gwardiya nga inkabil ti suspek ti nasao a kallugong iti uneg ti bado daytoy.
Sinurot ti gwardiya ti suspek iti ruar ti mall ken sadiay a nakitana ti panaglugan iti taxi ti suspek ken ti dua a kadua daytoy isut gapuna a nagtakder daytoy iti sango ti lugan.
Rimuar manipud iti taxi ti suspek ken ti maysa a kaduana ngem kinamat daytoy ti gwardiya agingga a nakemmegna ti suspek nupay nakalibas ti dua a kakadua daytoy.
