BAGUIO CITY–Maipaspasidong paylaeng iti obserbasyon iti pagagasan ti maysa a turista kalpasan a nadangran daytoy iti panakatnagna iti uneg ti Sumaging Cave sadiay Balugan, Sagada, Mountain Province idi kalman.
Nabigbig daytoy a ni Cindylyn Barja Sta. Romana, 24-anyos ken residente ti Tanauan, Batangas.
Maibasar iti report, simrek ti biktima ken ti tallo a kakaduana iti Lumiang Cave ken bayat ti kaaddada iti kaudian a drop portion ti gukayab a konektado iti Sumaguing Cave ket aksidente a naikadlis daytoy.
Gapu iti napasamak, natnag ti biktima iti agarup nasurok uppat a metro.
Dagus met a nagpaarayat ti tour guide dagitoy kadagiti maskenan nga opisina ken naiturong iti Saint Theodore’s Hospital sadiay Sagada ti biktima.
Nagsagrap daytoy iti gasgas iti kanawan a saka ken makapaspasar daytoy iti back pains.
