BAGUIO CITY–Pimmusay ti maysa a lalaki kalpasan a limmaban kadagiti pulis a nangisayangkat iti check point operation sadiay Catubbo, Atok,Benguet.
Sigun kenni Police Superintendent Radino Belly, hepe ti Intelligence Branch ti Benguet Provincial Office , nabigbigda ti pimmusay babaen iti ID card daytoy a ni John Arguelles ken residente ti Quezon City.
Kinunana nga agur-uray iti paglugananna a bus ti suspek ngem nakitana nga adda iti checkpoint dagiti pulis iti nasao a lugar.
Ginandat ti suspek nga aglibas ken pinaputukanna dagiti pulis agingga a kinamat ken pinaltugan met dagiti operatiba ken natamaan daytoy.
Narekober iti suspek ti maysa a caliber-38 nga awananan iti serial number ken ti maysa a kilo ken 50 a gramo ti marijuana bricks nga aggatad iti P150,000.
Kabayatanna, saan pay a nabigbig dagiti maatap a kakadua daytoy gapu ta mabuteng da a dumalan iti nasao a check point.
Agtalek dagiti otoridad a maysa ti grupo ti suspek kadagiti mangsupsuplay iti marijuana sadiay Metro Manila.
