BAGUIO CITY- Sipappannakkel ni Wreigh Jann Tamayo a kualipikado ti University of Baguio Laboratory Elementary School (UBLES) Street Kinetix Dance Crew iti world chaphionship ti United Dance organization a maangay sadiay United Kingdom.
Ti nasao a dance crew ti mangibagi iti pagilian a Pilipinas para iti world chaphionship.
Daytoy ket kalpasan ti pannakipasetda iti UDO Asia Pacific Street Dance Championship 2026 sadiay Thailand.
Iti interview ti Bombo Raydo kenni Wreigh Jann Tamayo, coach ti UBLES Street Kinetix, kinunana a nagun-od ti dance crew ti top 16 manipud kadagiti 82 a nakipaset.
Saanda man a nagun-od ti kaunaan a pwesto, impetteng ni Tamayo a dakkel para kadagiti ubbing ti makipaset iti Asean Pacific.
Sigun iti maysa kadagiti miembro ti Dance crew a ni Dean Dreigh Krayon Y. Tamayo, napintas ti kapadasanna, nangruna ta daytoy ti kaunaan a pannakipasetda iti international competition.
Innayonna pay nga impakitada ti laing ken talendo dagitoy kabayatan ti performance dagitoy.
Sigun pay kenni Dean, kanayon nga ibalakad ti amana a ni Coach Wreigh nga ipakitada ti pigsa ken kabaelanda.
Kabayatanna, sumagmamano laeng kadagiti miembro iti UBLES Street Kinetix Dance Crew ti makipaset iti World Competition gapu iti kinakurang ti pinasial.
Dadduma met kadagiti miembro ket saan a pasok iti age bracket.
Maangay intun Agusto ti world championships ti United Dance organization sadiay United Kingdom.
Pampanggepen ni Coach Wreigh a mangisayangkat dagitoy iti fund raising ken ikonkonsiderana ti panangilako kadagiti paintings daytoy.
Mangnamnama ti nasao a Coach a babaen iti daytoy a wagas, makaurnongda iti kuarta nga aramatenda para iti world championship ti United Dance organization.
Mainaig iti dayta, agkidkiddaw met dagitoy iti suporta manipud iti lokal a gobierno.
Manamnama met ti naidumduma a konsepto para iti performance ti UBLES Street Kinetix iti world championship iti United Dance organization a maangay intun Agosto.//mp4
