BAGUIO CITY – Impanamnama dagiti meat vendors iti merkado publiko ti siyudad ti Baguio ti umdas a suplay ti karne ti baboy.
Iti panakiuman ti Bombo Radyo Baguio kenni Nancy Alabanza, meat vendor iti merkado publiko, kinunana nga umdas pay laeng iti suplay ti karne ti baboy ditoy siyudad uti baet ti iseserrek ti African Swine Fever (ASF) iti kabangibang a probinsia ti Benguet.
Sigun kenkuana, adda latta dagiti supplier ti karne ti baboy a saan a naapekataran iti ASF a pagtataudan dagiti nasao a produkto.
Imbinglayna a kangrunaan ita a pagtataudan ti suplay dagitoy iti karne ti baboy ket sadiay Marcos Highway; La Trinidad, Benguet ken iti Slaughter House sadiay Barangay Sto. Niño.
Dinamakatna nga adda metlaeng dagiti karne ti baboy nga agtataud sadiay Pangasinan a saan nga naapektaran iti nasao a sakit dagiti dingwen.
Kaggidan iti daytoy, impasigurado ni Alabanza a natalged dagiti lakoda a karne ken addaan iti umno a dokumento dagiti suplayer dagitoy.
