BAGUIO CITY – Impanamanama ti Baguio Water District (BWD) a saan nga agkurang ti suplay ti danum iti siudad kabayatan ti panagraira ti La Niña agingga inton Abril.
Sigun kenni BWD General Manager Engr. Salvador Royeca, umdas dagiti naurnong a danom kadagiti water reservoirs ti siudad ken saan pay a naaramat dagitoy
Inlawlawagna nga ita a pandemya ket nababa ti demand ti danum no idilig idi awan paylaeng ti pandemya gaputa awan la unay ti economic activities.
Kinunana nga iti panagwanawanda ket dumandanon laeng iti 30,000 agingga 45,000 a cubic meters iti innaldaw ti maar-aramat dagiti umili ti siudad.
Nupay kasta, namnamaenda nga ita a bulan ket adda iti pagngatuanna ti pagkasapulan gaputa adu dagiti nakalinya nga aktibidad iti siudad kas ti PMA Alumni Homecoming ken dadduma pay.
Kinunana a naka-standby met latta ti BWD iti kanito a maobserbaran ti panagngato ti pagkasapulan ti danum.
Impettengna nga adda met ti nakasagana a danum a naurnong iti Santo Tomas Rain Catch Basin ken iti Busol Watershed a maaramat iti kanito nga agkurang ti suplay.
Maipalagip nga inwaragawag ti PAGASA nga agpaot agingga inton Abril ti panakapasar ti La Niña nupay saan la unay a nakaro nga epekto ti La Niña ti mapasaran ditoy Luzon.
