BAGUIO CITY – Umdas ti suplay ti nateng nga agtaud iti probinsia ti Benguet, Ifugao ken Mountain Province para iti masungad a selebrasyon ti Paskua ken kadagiti sumarsaruno pay a bulan.
Impasigurado daytoy ni Agot Balanoy, panakabagi ti liga dagiti asosasyon iti La Trinidad Vegetable Trading Post iti baet ti panagngato ti demand para iti nateng.
Inlawlawagna iti panakiyuman ti Bombo Radyo Baguio kenkuana nga adu latta dagiti mannalon iti Benguet ti nagmula manen ita a bulan ken idi napalabas a bulan iti baet ti panakaupayda iti nabayag a panaglaka dagiti nateng ken iti panakalugida gapu iti epekto ti agdama a pandemya.
Dinakamatna nga uray adu ti nalugi iti dua a planting season ita a tawen ket adu latta a mannalon ti nagmula manen para iti Disyembre nangruna ita a ngimmina manen dagiti nateng.
Innayon pay ni Balanoy nga adda met dagiti mannalon a naapektaran gapu kadagiti mapaspasaran a panagtudtudona iti lokalidad. -JJ/editedbyND
