BAGUIO CITY – Impanamnama ti Benguet Electric Cooperative (BENECO) nga adda ti umdas a suplay ti kuryente iti masungad a May 14, 2018 Barangay ken Sangguniang Kabataan (SK) Elections.
Sigun kenni Atty. John Paul Martin, City Election Officer ti Baguio, nakikoordinardan iti BENECO seknan iti umdas a suplay ti kuryente iti nasao nga aldaw ti eleksion.
Dinakamatna a sagudayen ti linteg nga iti panawen ti eleksion ket na-deputize dagiti electric cooperatives ken dagiti dadduma pay a power corporations ken distributors a mangipaay ti umdas ken saan a maputputed a suplay ti kuryente iti election day.
Innayonna a sinuratanda ti BENECO ken iti sungbat ti kooperatiba ket naipasigurado nga awan ti naituding a system maintenance activity iti nasao nga aldaw ti May 14.
Nupay kasta, inaklonna nga adda dagiti banag a saan a mapakpakadaan a mangitunda iti panakapukaw ti suplay ti kuryente.