BAGUIO CITY–Umdas latta ti suplay ti mailaklako nga NFA Rice iti amin a retail outlet iti probinsia ti Benguet ken ditoy siudad ti Baguio.
Iti panakipatang ti Bombo Radyo kenni Cecilia Concubierta, provincial manager ti NFA Baguio –Benguet, dumanon iti 17, 000 a kaban a bagas ti agtaltalinaed iti bodega dagitoy sadiay Loakan,Baguio City.
Kinunana nga agtultuloy ti panagawatda a suplay ti bagas manipod iti Poro Point sadiay La Union ngem temporaryo a naitantan ti panakaibunag dagiti bagas gapu iti mapaspasaran a panagtudtudo iti lokalidad.
Impanamnamana met a patas ti alokasion kadagiti amin nga NFA retailers iti probinsia ken ditoy siudad depende iti pagkasapulan dagiti konsyumer.
Nupay kasta,inlawlawagna nga awanen ti magatang nga P27 a bagas gaputa nangrugi idi Agosto 6 ket mailaklako dagiti NFA rice iti P32 tunggal kilo.
