BAGUIO CITY–Pinaglibakan ti La Trinidad Cutflowers and Ornamental Growers Association dagiti damdamag nga agkurkurang ti suplay dagiti sabong para iti Valentines Day.
Impanamnama ni Andy Colte, presidente ti nasao nga asosasion nga umdas ti suplay ti sabong para iti aldaw dagiti puso.
Kinunana nga adu ti suplay ti sabong para ditoy lokalidad kasta metten kadagiti maiturong iti nagduduma a paset ti pagilian.
Dinakamatna nga adda ti naipabulod a trak iti asosasion dagitoy ken dagitoy a mismo ti mangibibiahe kadagiti sabong paturong iti lowlands.
Mainaig iti daytoy ket inaklon ni Colte a ngimmato ti presio dagiti sabong gapu iti Valentines Day.
Kinunana a kadawyan a manayonan ti presio dagiti cutflowers kabayatan dagiti okasion uray umdas ti suplay kadagitoy.
