BAGUIO CITY–Posible a makaidiaya dagiti strawberry growers iti nalatak nga Strawberry Farm sadiay Betag, La Trinidad, Benguet iti strawberry picking kadagiti turista inton Disyembre.
Sigun kenni Federation of La Trinidad Valley Farmers-Irrigators Association president Jumelyn Buya, manarimaan ti panagmula dagitoy malaksid pay kadagiti suplay ti strawberry nga agtataud sadiay Madaymen, Kibungan a mailaklako met kadagiti stalls iti aglawlaw ti Strawberry Farm.
Kinunana a ti produksyon ti strawberry ket agpa-ut laeng iti dua agingga tallo a bulan isut gapuna a maipanamnamada ti umdas a suplya ti nasao a prutas kadagiti sumarsaruno a bulan.
Dinakamatna a ti P450 tunggal kilo a presyo ti strawberry ita ket normal laeng gaputa kurang ti suplay.
Kabayatanna, apektado met laeng ti negosyo dagiti agilaklako ti strawberry ice cream iti aglawlaw ti nasao a tourist spot.
Sigun kenni Dominic Herero, vendor ti strawberry ice cream, marigatanda nga agbirok iti suplay ti nasao a prutas a maaramid nga ice cream.
Dinakamatna nga apektado pay ti negosyoda gaputa manmano dagiti kostumer dagitoy kalpasan ti bagyo nangruna ta manmano ti turista nga agturturong sadiay.
Imbingayna a tunggal weekend ket makapastrekda iti P4,000 agingga P5,000 ngem ita ket saanda payen a makadanun iti P1,000.
