BAGUIO CITY – Mapirmaan ti katulagan iti nagbaetan ti lokal a gobyerno ti Baguio City ken ti Land Transportation Office (LTO) – Cordillera para iti umno a disposisyon ti umad-ado a saan a masaksaka a plaka dagiti lugan a nakumkumpiskar dagiti pulis ken deputized personnel ti Public Order and Safety Division (POSD) ken barangay officials a mangipatungpal ti nagduduma a linteg trapiko.
Sigun kenni LTO-Cordillera regional director Francis Ray Almora, maipimpinal paylaeng dagiti agbalin a kondisyon ti nasao a katulagan.
Kinunana a ti katulagan ket paset ti kampanya ti LTO iti nainget a panakaipatungpal ti polisiya a ‘no-detachment’ wenno saan a panagbaklas dagiti law enforcers iti plaka ti lugan gaputa maibilbilang dagiti plaka a pribado a sanikua ti agtagikua iti lugan ken nasken a permanente a nakakonektar iti lugan.
Paset ti mapirmaan a katulagan a maipalubos ti panagaramat ti Baguio City Police Office–Traffic Enforcement Unit iti management information system ti LTO iti panakamarka dagiti plaka dagiti lugan nga addaan ti panaglabsing.
Immunan a kiniddaw dagiti traffic enforces ti Baguio City ti tulong ti LTO-Cordillera iti umno a disposisyon dagiti plaka dagiti lugan a nakumkumpiskar dagitoy gapu iti agtultuloy a panakaunorng dagitoy iti opisinada gapu iti panagkedked dagiti agtagikua a mangsaka kadagitoy.
Gapu iti daytoy, kinuna ti LTO-Cordillera a dagiti nakumpiskar a ket makabilan ti ‘tag’ ken mai-alarma iti management information system ti LTO tapnu mapilitan dagiti agtagikua a mangbayad iti multada sakbay ti panakaikkat ti nasao nga alarma tapnu maipalubus ti panagpabaro iti rehistrasyon ti agtagikua iti nasao a lugan.
Sigun pay kenni Almora, ti panaka-aramat ita ti management information system ti LTO ket paset ti manarimaan a reporma iti ahensia para iti panakaimplementar ti ‘no-contact policy’ iti panagtiliw kadagiti aglablabsing kadagiti linteg trapiko.
