BAGUIO CITY- Naobserbaran ti adu a basura a naiwara kadagiti kalkalasada ken tourist sites a masarakan iti Lualhati barangay iti Baguio City kabayatan ti Semana Santa.
Iti interview ti Bombo Radyo Baguio, immapela ni Barangay Kapitan kadagiti turista ken residente iti umno a panangibelleng ti basura nangruna iti masakopanna a pakasarakan dagiti tourist sites iti siudad.
Kasaruno metlaeng daytoy ti agtultuloy nga clean-up drive nga ipatpatungpal dagiti opisyales ken volunteers iti masakopanna a barangay a mangdaldalus wenno mang-akakop kadagiti rugit wenno basura a a naurnong kabayatan ti holidays.
Binigbigna met dagiti lugar a nakasarakan dagiti adu a basaru kas iti paset ti Wright Park ken Romulo Drive paturong iti Mansion Park nu sadinno kalpasan ti picnic dagiti sumagmamano a turista ket ibatida latan ti basura dagitoy.
Imbinglayna met a paset ti panangidauloda kas opisyales ti panakamintinir ti kinadalus ti barangay Lualhati malaksid a liklikanda a maipablaak iti social media ken mapabpabasol nu narugit ti aglawlaw gapu kadagiti basura nga ibatbati laeng dagiti turista.
Mainaig iti dayta, inaklonna nga agtaltalinaed a parikot ti parking space para kadagiti turista a sumangsangbay iti siudad.
Sigun kenkuana, nupay agdepdependar ti siudad iti turismo parikot met ti kinaawan ti naidesignar nga parking space para kadagiti turista nga agingga ita ket ad-adalen dagiti maseknan nga ahensia.
