Kiddaw dagiti transport group ti umno a panakaadal ti maisaksakad a panakailaksid dagiti senior citizens iti number coding scheme iti siudad ti Baguio.
Iti panakiuman ti Bombo Radyo kenni Wilson Bumay-et Jr., Jeepneys Federation President ti Baguio-Benguet, kinunana a dakkel a parikut ti siudad ti nailet a gunay ti trapiko nu sadino ti panakaisakad wenno panakaipasa ti nasao a singasing ket manamnama a mangitunda iti mas nail-ilet pay a gunay dagiti lugan gapu iti panakapalubos a panagserrek dagiti pampribado a lugan dagiti senior citizens nangruna iti Central Business District (CBD).
Gapu iti dayta, kinuna ni Bumay-et Jr. a nasken a rumwar dagiti konsehal ken ipadasda ti aglugan kadagiti pampubliko a lugan ken kitaenda ti kasasaad ti siudad ti Baguio.
Sigun kenni Bumay-et Jr., saan pay a panawen tapno maisakad ti nasao nga ordinansa gapu ta mas maymaymayat no papintasen pay dagiti konsehal ti transportasyon ti siudad.
Kinuna ti Jeepneys Federation President ti Baguio-Benguet a rumbeng a mas ikkanda pay iti pokus ti pampubliko a transportasyon tapno saanen a kasapulan nga usaren dagiti commuters ti luganda wagas tapno maliklikan ti sobra a congestion dagiti lugan.//Bombo Mera Pacpacan