BAGUIO CITY- Impaganetget ti Commission on Population and Development (POPCOM)-Cordillera a napateg ti umno nga edukasion kadagiti agtutubo tapno mailiklik dagitoy iti pre-marital sex ken teenage pregnancy.
Sigun kenni Magdalena Abellera, Regional Director ti nasao nga ahensia, uray pay maysa laeng a kaso ti teenage pregnancy ti mailista iti rehion ket makapalaarma latta daytoy.
Dinakamatna a bimmaba iti 11% ti kaso ti teenage pregnancy iti Cordillera sipud nangrugi ti COVID-19 pandemic gapu iti lockdown restrictions.
Iti datus, nailista ti Philippine Statistics Authority ti 2,468 a live births kadagiti agtawen iti sangapulo agingga sangapulo ket siyam nga ina idi 2020 no sadino nababbaba daytoy no idilig iti 2,799 a live births idi 2019.
Iti entero a rehion, nailista ti Benguet ti kangatoan nga insidente ti Teenage Pregnancy a dumanon iti 952, sarunoen ti Ifugao a nakailista ti 368 a live births, 356 iti Abra, 298 iti Kalinga, 272 iti Mt. Province ken 222 iti Apayao.
Sigun kenni Abellera, maysa a rason iti napasa a panagsikog ken panagpasngay dagiti agtutubo ket ti nasapa a panakipagrelasion dagitoy bayat a dagiti daduma ket biktima ti panagrames.
Gapu iti daytoy, impetteng ti POPCOM-Cordillera a napateg ti papel dagiti nagannak a mangbantay ken mangigiya kadagiti anakda nga ag-eskwela tapno maipaayanda ti napintas a masakbayan.//cara
