BAGUIO CITY– Karaman dagiti health care workers ditoy rehiyon Cordillera a maipaayan iti bakuna a Sinovac nga indonar ti China.
Sigun kenni DOH-Cordillera Regional Director Dr. Ruby Constantino, naituding a sumangpet ti inisial a batch ti bakuna intun Sabado, Marso 6 para iti maangay a vaccination dagiti health care workers intun Domingo, Marso 7.
Pakairaman dagiti nabigbig a mabakunaan ditoy rehiyon ti 3,606 nga health care workers manipod iti Baguio General Hospital and Medical Center(BGHMC), Luis Hora Regional Memorial Hospital(LHRMH) iti Bauko ken Bontoc General Hospital(BoGH) sadiay Mountain Province, Kalinga Provincial Hospital(KPH) ken iti Benguet General Hospital(BeGH).
Nanipod iti pakabuklan a bilang, 1,871 ti initial a mabukanaan iti BGHMC, 629 iti LHRMH, 326 iti KPH, 222 iti BoGH ken 560 iti BeGH.
Nabigbig ti BGHMC kas umuna iti priority list kas COVID-19 referral center bayat a dagiti dadduma nga pagagasan ket napili maibasar iti bilang ti kaso nga imanmanihar dagitoy.
Manarimaan met ti koordinasion kadagiti DOH provincial wenno city offices, local health officers ken facility administration para iti panagsagana ken preparasyon dagitoy iti panagsangpet ti nasao nga bakuna.
Gapu iti daytoy, iyap-apela ni Constatino ti panagkaykaysa dagiti maseknan tapnu masigurado a nakasagana dagiti nabigbig nga ospital ken health workers ket nakagasagan nga makaawat ken mangisayangkat iti panagbakuna.
