Naisayangkat iti siudad ti Baguio ti kaunaan a Dengue Summit babaen iti City Health Services Office (CHSO) nga idadauloan ni Dr. Celia Flor Brillantes idi napalabas a lawas.
Addan daytoy iti tema a “One Health, One Baguio, One Dengue-Resilient Community”. Nagtitipon ditoy dagiti representatives manipud iti nagduduma a government agencies, academic institutions, professional ken barangay health workers, civil society organizations, media, ken miyembro ti Baguio Anti-Mosquito-Borne Diseases Committee.
Kabayatan iti nasao a panagtataripnong, imbinglay ni Mayor Benjamin Magalong a mannarimaan ti panagadal ti siudad kadagiti posible a solusyon tapno mas mapatibker pay ti dengue prevention efforts iti siudad.
Imbinglay met ni Dr. Brillantes a maysa a ‘shared responsibility’ ti pananglaban iti dengue babaen iti panangadaptar kadagiti addang a makatulong iti panangsalwad kadagiti komunidad kontra iti dengue.
Kabayatanna, inyebkas met ni Councilor Elmer Datuin, dadaulo ti City Council Committee on Health and Sanitation, Ecology, and Environmental Protection ti panagyamanna kadagiti barangay health workers, barangay officials ken dadduma a grupo gapu iti kontribusyonda iti kampanya kontra dengue. //kcs//
