BAGUIO CITY – Dumanon iti 160 nga indibidual ti nagparehistro iti umuna nga aldaw ti voter registration nga insayangkat ti COMELEC-Baguio iti kadakkelan a mall ditoy siudad.
Maipalagip nga idi kalman, September 1 ket nangrugi ti umuna nga aldaw ti panagparehistro ti COMELEC-Baguio iti nasao a mall ken agpaut daytoy agingga inton tapos, September 30.
Sigun kenni City Election Officer Atty John Paul Martin, maakomodar dagiti agturong sadiay iti alas-otso ti agsapa agingga alas-siete ti rabii manipud Lunes agingga Biyernes bayat nga alas-otso ti agsapa agingga alas-singko ti malem tunggal Sabado ken holidays.
Immunan nga inlawlawagna a naiyakar iti maikatlo a kadsaaran ti kadakkelan a mall iti siudad ti pagparehistro-an dagiti botante gapu iti limitado nga espasyo iti opisina dagitoy sadiay Gov. Pack Road ken tapno agtalinaed a masurot ti minimum public health standards kontra iti COVID-19.
Puntirya ti COMELEC-Baguio a maiparehistro ti nasurok 4,000 nga indibidual agingga iti panagleppas ti voters’ registration.
