Impeksa ti Baguio City Police Office (BCPO) a generally peaceful ti pananglagip iti Undas 2026 iti siudad ti Baguio iti tengnga ti nasurok 65,000 nga indibudual a bimmisita kadagiti sementeryo.
Sigun iti datos ti Baguio City Police Office (BCPO), addaan pakabuklan a 65,533 ti nagturong kadagiti walo a kangrunaan a sementeryo iti siudad manipud October 31 agingga November 2, 2026.
Nangatngatoo daytoy iti 50.12% no idilig iti 43,651 a nairekord idi 2025.
Nupay kasta, nakailista met ti BCPO iti 568 a prohibited items a nakumpiskar bayat ti panagbantayda iti seguridad kadagiti sementeryo, 81.47% a nangatngato ngem iti 313 a naala idi napalabas a tawen.
Karaman kadagiti nakumpiskar dagiti dua a boga a nasarakan idi October 31.
Saan laeng a kadagiti sementeryo ti nagbantayan dagiti kapulisan nu di ket kadagiti metlaeng columbaria, memorial parks, transport terminals ken tourist destinations.
Gapu iti daytoy, pinagyamanan ni BCPO ti publiko, dagiti ahensya ti gobyerno ken volunteers gapu iti kooperasion ken pannakitinnulongda iti panangsalimetmet iti talna ken seguridad iti siudad bayat ti Undas.
Dagiti nasao a datos ket mangipakita iti panagtrabaho dagiti awtoridad tapno masigurado a natalged ti publiko, nangruna iti kaadu dagiti tattao a nagturong kadagiti sementeryo bayat ti nasao a panawen.
Agtultuloy met ti panangmonitor ti kapulisan kadagiti lugar a pagdudupadopan dagiti tattao tapno maliklikan dagiti insidente ken masigurado ti nasayaat a panagserbi kadagiti residente ken turista.
Kabayatanna, agsagsagana metten ti BCPO para iti holiday season sakbay a malpas iti agdama a tawen.
Mainaig iti dayta, ginuyugoy iti BCPO ti publiko a kanayon a makikoordinar iti opisinada ken sumurotda kadagiti pagalagadan tapno agtultuloy iti natalna ken natalged a siudad ti Baguio.// via Bombo Khey Reparip
