Nangisayangkat ti United Nations iti donation drive nga addaan panggep a makaurnong ti pakabuklan a $275 million wenno nangatngato pay kas tulong kadagiti biktima ti magnitude 7.7 a genggened idiay Myanmar.
Sigun iti United Nations, ti maurnong a pondo ket maaramat tapno matulungan dagiti umili sadiay nangruna dagiti nakaro a naapektaran iti napigsa a genggened, nu sadinno adu kadakuada ti agsagsagrap ti nagduduma a sakit, panagbisin, ken awan ti pagturugan a pagtaengan.
Immuna a kinuna ti nasao nga organisasion a kasapulan a makaurnong iti agingga iti $1.1 bilion a pondo, maibasar iti damo a humanitarian aid plan para iti mapatta-patta a 5.5 milion a tattao a naapektaran.
Nupay kasta, agingga lima laeng a porsiento laeng ti naipaayan ti pondo.
Gapu iti umad-adu a kasapulan dagiti biktima ti ginggined, kinuna ti UN a kasapulan ti kanayonan a “resources” para iti tulong.
Agserbi a pokus ti baro nga inisiatiba ti 1.1 million ‘vulnerable people’ idiay Myanmar a kaadduan ket ubbing ken babbai a naipadamag a sumangsango iti gender-based violence, food insecurity ken kinakurang iti umdas a pannakagun-od iti reproductive health.
Iti agdama, addan ti 6.3 million a tattao idiay Myanmar ti agkasapulan ti kanayunan a tulong a posible a ngumato pay bayat nga agtultuloy ti kinarigat a sitwasion kadagiti biktima.
Maipalagip nga idi Marso 28, napasamak ti gingined iti nasao a pagilian a nakatayan ti nasurok 3,600 a tattao.
