Dumanon laeng iti P158.7 bilion ti naikeddeng nga unprogrammed appropriations iti administrasion ni President Ferdinand Marcos Jr. babaen ti naisingasing a 2025 national budget gapu iti manamnama a nababa a revenue collection inton sumaruno a tawen.
Daytoy ti impakaamo ni Senador Grace Poe a nagsao iti nagan dagiti economic managers a nangisponsor iti 2025 General Appropriations Bill (GAB) ti administrasion ni President Marcos Jr.
Daytoy ket kalpasan a kinuwestunar ni Minority Leader Aquilino “Koko” Pimentel III nu mabalin nga usaren dagiti “idle reserve funds” a mangpondo kadagiti proyekto a naipila iti sidong dagiti unprogrammed appropriations.
Ngem inlalawag ni Senador Poe a saan a karaman ti idle funds iti agdama a bersion ti 2025 General Appropriations Bill (GAB).
Inladawan ti Department of Budget and Management (DBM) a ti unprogrammed appropriations ket maysa a kita ti “standby appropriations.”