BAGUIO CITY – Naisubli manen iti pagagasan idi kalman ti 13 kadagiti 42 nga estudyante a nasabidongan sadiay Natubleng, Buguias, Benguet.
Maibasar iti impormasion a nakalap ti Bombo Radyo-Baguio, malaksid iti 9 nga estudyante iti Grade V ket naiturong met laeng iti Benguet General Hospital ti adviser dagitoy ken 4 pay nga estudyante iti Grade VI.
Naamuan a nakapasar manen iti panagsakit iti tiyan ken iti ulo dagiti estudiante bayat a simmakit met laeng ti ulo ti mannursuro dagitoy.
Sigun iti mannursuro, daytoy ti nangdalus ken nangpunas kadagiti estudyante idi nagbakwar dagitoy ngem kalpasanna ket daytoy metten ti nakapasar iti panagsakit iti ulo.
Sigun iti maysa a concerned citizen a timmulong iti panakaiturong dagiti estudyante iti ospital, nagsasaruno ti panagsangit dagiti estudyante gapu iti sakit a narikna dagitoy.
Maipalagip nga idi June 27 ket nasabidongan dagiti 42 nga estudyante ti elementarya ken sekondarya sadiay Natubleng, Buguias manipud iti kendi nga inwaras ti agasawa a Koreano a ginatangda iti grocery sadiay Abatan, Buguias.
Iti met panakipatang ti Bombo Radyo kenni Jane Bao-idan, Grade 5 Adviser iti Natubleng Elementary School, kinunana a 9 kadagiti estudyantena ti naisubli manen iti pagagasan idi kalman bayat a dagiti 3 ket estudyante ti Grade VI.
Kinunana a saan laeng a ti ‘strawberry curls’ a kendi ti kinnan dagiti ubbing ngem ketdi, adda pay ti dadduma a junk foods wenno chichirya nga inwaras ti agasawa a Koreano.
Innayonna pay a saan nga impakada ti agasawa a Koreano ti panangiwarasda iti kendi ken chichirya kadagiti estudyante.
Iti agdama ket maur-uray paylaeng ti resulta ti laboratory test iti sample ti kendi a kinnan dagiti estudyante.
