BAGUIO CITY – Kinumpirmar ti Bontoc Municipal Police Station a simmuko ti dua kadagiti tallo a suspek a nangpapatay iti maysa a police major sadiay Eyeb, Poblacion, Bontoc, Mountain Province idi rabii ti domingo.
Iti panakiuman ti Bombo Radyo kenni PCI Jimmy Macues, hepe ti Bontoc PNP, simmuko dagiti suspek iti unit ti Philippine Army a nakadestino sadiay Mountain Province.
Nupay kasta, nagkedked daytoy a mangipaay iti detalye seknan iti pakabigbigan dagiti simmuko a suspek ngem kinunana a residente met laeng dagitoy ti Poblacion, Bontoc.
Maipalagip a paawid ti biktima a ni PCI Benjamin Challoy idi nasabatna dagiti tallo a suspek a nabartek ken nagigidanda a nagna.
Kabayatan ti pannagnada ket timmaud ti saan a panagkinaawatan iti nagbaetan dagiti suspek ken ti biktima, sinurotda ti biktima iti balay daytoy ken pinalpaltoganda sakbay a naglibas dagitoy.
Iti agdama ket an-anopen pay laeng dagiti otoridad ti maysa a kadwa dagiti suspek.
Itay agsapa ket naitabon metten ti napapatay a police major.
