BAGUIO CITY – Agtultuloy ti panagkalap iti ebidensiya ti Baguio City Police Office Station 7 para iti posible a panakabigbig dagiti suspek a nangpapatay iti gwardiya ken nangtakaw iti kwarta ti maysa a kooperatiba iti Baguio City Public Market idi napalabas a lawas.
Iti panakiuman ti Bombo Radyo kenni PCI Marlo Evasco, dadaulo ti nasao a kwerpo ti pulisya, iti panangrepasoda iti CCTV footage manipud iti CCTV camera a naimuntar iti merkado ket adda ti nakitada a dua a persons of interest.
Nupay kasta, kinunana a saan unay a mailasin ti rupa dagitoy gaputa nakasuotda iti surgical mask ken bull cap.
Innayunna a makita met laeng ti bitbit dagiti suspek a maysa a sako a maatap a nakaikabilan ti tinakawda a vault a naglaon iti nasurok kagudua a milyon a pisos, malaksid pay iti AVR ken camera.
Maipalagip a pinapatay dagiti suspek ti gwardiya ti Baguio Market Vendor’s Association Cooperative a ni Robert Oficiar, 27 anyos, ken residente ti T. Alonzo Street, Baguio City.
Naglak-am daytoy iti bagsol iti kannigid a barukongna ken iti nagbaetan ti dua a mata daytoy, sumagmamano a sugat iti ulona ken marka iti tengnged daytoy.
