BAGUIO CITY – Binigbig ti 54th Infantry Battalion, Philippine Army, ti dua a babai a medical personnel a mapapati a kameng ti rebelde a grupo, partikular ti Nona del Rosario Command ti Ilocos-Cordillera Regional Committee.
Nabigbig dagitoy kalpasan a narekober ti identification cards-da iti encounter site sadiay Namal, Asipulo, Ifugao.
Nabigbig dagitoy a da Anna Marie Leung, maysa a physician kas maibasar iti PRC ID dagitoy ken dua nga ATM cards, ken ni Isabelle Anne Ramos, maysa a nurse kas maibasar iti postal ID daytoy.
Mapapati a maysa ni Leung kadagiti nadangran iti insidente kalpasan a maysa a sibilyan iti lugar ti nakakita kenkuana a binagkat dagiti kakadwana paadayo iti nasao a lugar.
Segun kenni Lt. Col. Nicolas Quemado Jr., commanding officer ti 54th IB, mapapati a ti kuta a rinaut ti militar sadiay Ifugao ti pagkutkutaan dagiti nangangato nga opisyal ti Communist Party gapu iti profile dagiti nabigbig a personalidad.
Impanamnamana met a nakasaganada a tumulong kadagiti nadangran a kameng ti rebelde a komunista nangruna ta ti maysa kadagitoy ket physician a babai.
Innayunna a ti pamilya dagiti agtagikua kadagiti narekoberda nga ID cards ket mabalin a makiuman iti dadaulo ti Armed Forces of the Philippines wenno iti 54th IB tapnu maalada dagiti ID ken ATM cards.
Dinakamatna nga iti agdama ket makikokoordinarda iti Anti-Money Laundering Council para iti possible a panaka-freeze dagiti bank accounts a mapapati nga ar-aramaten dagiti NPA sadiay Ifugao.
