BAGUIO CITY – Maipaspasidong ita iti imbestigasyon ti tallo nga indibidual a maatap nga adda pakainaiganna iti panakauram ti dua a volvo truck ti mining company sadiay Tapac, Ampucao, Itogon, Benguet itay agsapa.
Immunan a hinarang dagiti kameng ti Baguio City Police Office Station 3 ti nagluganan dagiti nasao nga indibidual sadiay Pacdal Circle, siudad ti Baguio.
Segun kenni PSSupt. Florante Camuyot, provincial director ti Benguet PNP, impasidongda iti full alert ti amin a kuerpo ti pulisya, pakairamanan ti siudad ti Baguio, a nangitunda iti panakaharang dagiti nasao a person of interest.
Patien met ni Camuyot a ti inaramid dagiti maatap a kameng ti NPA ket wagas ti panangipakitada nga agar-garaw ti rebelde a grupo kalpasan ti panangideklara ti gobyerno iti all out war kontra kadagitoy.
Mainaig iti daytoy, kinuna ti opisyal a papigsaenda pay ti puersa dagiti pulis sadiay Itogon tapnu maipanamnama ti seguridad dagiti umili nangruna ta sumagmamano kadagiti residente sadiay ti napabotangan iti nasao nga insidente.
Inlawlawagna a kas maibasar kadagiti naalada a materyales ket explosive device ti inaramat dagiti maatap a kameng ti NPA iti pananguramda iti dua a truck ti mining company sadiay Itogon, Benguet.
Kinunana a mapapati nga impakbo dagiti rebelde ti pulbora dagiti exlosive device iti dua a truck sakbayda a sinindian.
Insalaysayna a hinarang dagiti rebelde a grupo ti lugan da Ampucao Punong Barangay Eddie Amuasen a pasalog kuma sadiay Ampucao Proper.
Kinunana nga inala dagiti rebelde ti lugan dagiti opisyal ti barangay ken daytoy ti inaramatda a pinangharang iti dua a volvo truck ti Philex Mining Corporation sadiay Sitio Tapac tapnu saan dagitoy a makasang-at.
Innayunna nga idi nakontrol dagiti rebelde ti dua a truck ket pinapanawda met laeng dagiti opisyal ti barangay a saanda nga inan-ano.
Pinababada met laeng dagiti drivers ti dua a truck ken kinuna dagiti rebelde a saan a dagitoy ti puntiryada nu di ket panggepda laeng nga uramen dagiti kagawaan ti kompanya.
Dinakamat ni Camuyot nga iti agdama ket nakadeployen dagiti kameng ti Benguet Provincial Public Safety Company, Regional Public Safety Battalion, ken ti Philippine Army a mangkamkamat ita kadagiti rebelde nga NPA.
