BAGUIO CITY – Posible a maisayangkat ti face-to-face learning iti uppat a pagadalan ditoy siudad ti Baguio.
Dagitoy ket ti Santo Tomas Elementary School, Mil-An National High School, Happy Hollow National High School ken ti Baguio City National Science High School.
Inlawlawag ni DepEd-Baguio City Schools Division Superintendent Federico Martin a posible a maisayangkat ti face-to-face class kadagiti nasao a pagadalan no matungpal dagiti maikalkalikagum ken kadagiti nailatang a kondisyon.
Kinunana nga immanamong ti lokal a gobyerno ti Baguio iti panakaisayangkat ti face-to-face class kadagiti nasao a pagadalan.
Dinakamatna a posible a mangrugi ti face-to-face class kadagiti nasao a pagadalan inton Enero ti sumaruno a tawen no agtalinaed a nababa ti kaso ti COVID-19 iti Baguio City ken no agtalinaed a COVID-19-free dagiti sitio wenno barangay a mangsaksakop kadagiti uppat a pagadalan.
Sigun kenkuana, agtultuloy ti panakaisagana ken panakakompleto dagiti dokumento dagiti uppat a pagadalan a maisumitir iti DepEd.
Innayonna a maipaspasidong metten iti panagsanay ken nagduduma nga aktibidad dagiti personnel dagiti uppat a pagadalan tapnu maobserbaran dagiti nasken a maisimpa.
Imbinglay ni Martin a nabayag a kidkiddawen dagiti nagannak ken estudyante iti siudad ti face-to-face class isut gapuna nga inkagumaanda met a nagpili kadagiti kwalipikado a pagadalan.
Sigun pay kenkuana, manamnama a manayonan dagiti uppat a pagadalan.
Maipalagip a 20 laeng a pagadalan iti Cordillera ti immuna a napalubusan a mangisayangkat ti face-to-face learning manipud iti ginasgasut a pagadalan iti rehion a nagaplikar para iti daytoy.
Nailawlawag pay a nasken nga ipaay ti mismo a lokal a gobyerno ken nagannak dagiti estudyante ti pammalubos iti panakaisayangkat ti face-to-face class ken nasken pay a fully vaccinated dagiti teaching ken non-teaching personnel dagiti pagadalan.
