BAGUIO CITY — Pimmusay ti uppat a soldado bayat a nadangran ti dua a dadduma pay kalpasan ti maikadua a panakirinnupakda kontra iti rebelde a New People’s Army sadiay Besao, Mt. Province idi kalman.
Iti eksklusibo a panakiyuman ti Bombo Radyo kenni Lt. Col. Isagani Nato, panakangiwat ti Northern Luzon Command ti militar, kinunana a mangisaysayangkat iti combat operations ti 81st Infantry Battalion ti Philippine Army sadiay Dandanac, Tamboan, Besao, Mt. Province idi nakarinnupakda dagiti rebelde a mapapati a kameng ti Kilusang Larangang Gerilya-AMPIS nga idadauluan ti maysa a Ka Digbay.
Kinunana a nagpaut iti nasurok tallo nga oras ti rinnupak a nangitunda iti panakapapatay ti tallo a soldado ken panakadangran ti dua a soldado bayat a mapapati nga adda dagiti casualties kadagiti rebelde.
Nagkedked met daytoy a mangipaay iti nagan dagiti biktima a soldado gaputa saan pay a napaka-ammuan ti pamilya dagitoy.
Napukaw met dagiti soldado ti saggaysa a K3 Squad Automatic Weapon, M203 Grenade Launcher ken handheld radio ken dua nga R4 Rifles ngem sumagmamano kadagitoy ti narekober.
Dagus a naipatulod dagiti kanayonan a pwersa ti gobyerno iti nakapasamakan ti insidente bayat a dagus a naiturong iti pagagasan dagiti biktima a soldado.
Maipalagip nga idi Sabado ket maysa a soldado ti nadangran iti umuna a rinnupak iti nagbaetan ti agpada a benneg iti kapada a lugar bayat ti combat operations dagiti soldado sadiay.
Kabayatanna, agtultuloy ti hot pursuit operation ti militar kontra kadagiti nagsanod a rebelde a nakaranget ti militar sadiay Besao, Mt. Province.
Sigun kenni Lt. Col. Nato, kinunana a narigat a mapanan ti nasao a disso gaputa kabambantayan ken nasamek ti lugar.
Nupay kasta, agtultuloy met ti koordinasyonda iti dadduma nga ahensia ti gobyerno kadagiti local a gobyerno tapnu agtitinulong ken malapdanda ti kinaranggas ti grupo dagiti rebelde.
Dinakamatna a ti nakapasamakan ti rinnupak ket kuta wenno paglemlemmengan dagiti rebelde ngem gapu iti awan sardeng nga operasyon ti militar sadiay ket malimlimitaran ita ti garaw ken lugar a pagkutkutaan dagiti rebelde.
Kinunana nga arigna maip-ipiten dagiti rebelde isut gapuna a mapilpilitan dagitoy a lumaban gaputa awanen ti pagtarayan dagitoy.
Innayonna nga addan ti kanayonan a pwersa ti gobyerno iti nasao a lugar tapnu masigurado a makamatan ken maparmek dagiti nasao a rebelde.
