[UPDATE] 42 estudyante a nasabidongan iti kendi sadiay Buguias, Benguet, addan iti natalged a kasasaad

BAGUIO CITY – Natalgeden ti kasasaad dagiti estudyante ti elementarya ken sekondarya sadiay Natubleng, Buguias, Benguet a naitaray iti pagagasan kalpasan a nasabidongan dagitoy iti kinnanda a kendi idi napalabas a lawas.

Sigun kenni PSI Dexter Simon, hepe ti Buguias PNP, nakaruaren iti pagagasan dagiti amin a na-confine ken awanen kadagiti biktima ti naisubli iti pagagasan.

Kinunana a maur-uray laengen ti resulta ti laboratory test iti nasao a kendi.

Maipalagip a dumanon iti 42 nga estudyante ti nasabidungan gapu iti kinnanda a kendi nga inwaras ti agasawa a Koreano a da Lee In Suk ken Tiehua Woom.

Sigun iti agasawa, ginatangda laeng ti nasao a kendi iti maysa a groserya sadiay Buguias, Benguet.