![](https://img.bomboradyo.com/baguio/2019/07/bokod6.jpg)
BAGUIO CITY – Agtaltalinaed paylaeng iti Surgical Intensive Care Unit (SICU) ti Baguio General Hospital and Medical Center ditoy Baguio City ti maysa kadagiti lima nga Intsik a turista a nagsagrap ti nagduduma a dunor kalpasan a natnag ti naglugananda nga SUV iti rangkis sadiay Daklan, Bokod, Benguet idi malem ti Sabado, July 27.
Sigun kenni PCapt. Ruben Tamiray, hepe ti Bokod Municipal Police Station, adda iti SICU ti biktima a ni Tao Wei.
Kinunana a bin-ig nga agpapaimbag met iti surgical ward ti kapada a pagagasan dagiti uppat pay a turista a da Cheng Wei; Yan Kaihua, Ji Zilin ken Zhu Yazhou.
Naamuan a dagiti nasao a biktima ket inhenyero ken staff ti maysa a construction company sadiay Pasig City, Manila.
Innayonna a naiyawid metten sadiay Pandacan, Manila ti bangkay ti pimmusay a driver ti SUV a maysa a Pinoy a nabigbig a ni Jonathan Carnaje a dead on arrival iti Dennis Molintas District Hospital.
Maipalagip a pasalog ti SUV nga addaan plaka nga AKA 6085 a nagluluganan dagiti biktima manipud iti nalatak a Mt. Pulag idi aksidente a natnag daytoy iti rangkis nga addaan kauneg a dumanon ti 400 a metro.
Dagus met a nagresponde dagiti pulis, bombero ken dagiti maseknan a residente iti nasao a lugar. (with Bombo Florence Paytocan)