BAGUIO CITY – Agtaltalinaed paylaeng iti pagagasan ti lima kadagiti 13 a tattao a nadangran iti panakatumba ti bus nga Abra Traivedy Trans nga addaan plaka nga AYV-445 sadiay Naguilian Road, Yagyagan, Tuba, Benguet idi kalman ti agsapa.
Nabigbig dagitoy a da Whanny Adian Geston, 19, residente ti Betag, La Trinidad, Benguet; ni Bernaldo Ferrer de Guzman, 39, residente ti Manaoag, Pangasinan; Florendo Lim Sochoen, 58, residente ti San Carlos, Baguio City; Bernardo Camantiles Canor, 44, residente ti Itogon, Benguet; kenni Michael Ayangan Paladino, 31, ti konduktor ti bus a residente ti San Luis, Baguio City.
Nabigbig met ti driver ti bus a ni Rudy Tanan Alacyang, 27 ken residente ti Balili, La Trinidad, Benguet.
Immuna iti daytoy, pasalog iti kalsada ti bus paturong sadiay Abra idi napukaw ti preno isut gapuna nga indungpar ti driver ti lugan iti igid ti kalsada agingga a natumba daytoy.
Dagus met a nagresponde dagiti rescue groups ken naitaray iti pagagasan dagiti nadangran, no sadino, adda iti kritikal a kasasaad ni Geston ken ti konduktor ket adda iti seryoso a kondisyon.
Nakaruar metten iti pagagasan dagiti dadduma a nadangran iti nasao nga insidente.
