BAGUIO CITY – Agpapaimbag pay laeng ti siyam a pasahero pakairamanan ti lima nga ubbing a nadangran iti panakatinnag ti naglugananda a jeep sadiay Marcos Highway, Sitio Luding, Poblacion, Tuba, Benguet idi alas otso ti rabii.
Nabigbig dagitoy a da Mary jane Patalec, 6; Melita Patalec, 44; Melanie Patalec, 10; Maryjoy Patalec, 6; Jolisa Alipit, 4; Feliza Alipit, 40; Vernon Calaoan, 5; Eliza Calaoan, 42 ken ni Betty Gano, 44.
Segun kenni PCI Andres Calaowa, hepe ti Tuba Municipal Police Station, dumanon iti sangapulo ket walo ti pasahero ti nasao a jeep pakairamanan ti driver a ni Ricky Patras, 27, a residente ti Sitio Luding, Poblacion, Tuba, Benguet.
Kinunana a paturong ti jeep sadiay sitio Luding, Poblacion, Tuba kalpasan ti dinar-ayanda a bible study sadiay Pugo, La Union idi napukawan daytoy iti preno agingga a nagdirdiretso ken natinnag iti nasurok kumurang siyam a pulo a metro a kauneg a rangkis.
Kas resulta ket nadangran dagiti sangapulo ket innem a pasahero a dagus nga intaray ti Tuba Emergency Medical Services iti Baguio General Hospital ngem nakaruar a dagus ti pito kadagitoy.
Kinuna met ni PCI Calaowa a manarimaan ti panangalada iti affidavit of statement dagiti biktima nupay awan ti panggep dagitoy nga agipila iti kaso kontra iti driver gaputa agkakabagian met laeng dagitoy.
