--Ads--
BAGUIO CITY – Nakaruaren manipud iti pagagasan ti agiina a nadangran kalpasan a natupakan iti dakkel a bato ti SUV dagitoy sadiay Kennon Road, partikular iti Camp 3, Tuba, Benguet.
Nabigbig ti ina a ni Ginaly Cadap, 27-anyos ken ti dua nga annakna a 2-anyos ken 4-anyos manipud Pico, La Trinidad, Benguet bayat a saan a nadangran ti ama a ni PO2 Jefferson Cadap.
Maipalagip a pasang-at ditoy Baguio City ti lugan dagiti biktima idi killat a nargaay ti paset ti bantay ken naitupak ti dakkel a bato iti sangwanan ti luganda.
Dagus met a naitaray iti pagagasan ti agiina gapu iti nalak-am dagitoy a dunor.
Maipalagip pay a gapu iti nagsasaruno nga insidente ti landslide ken rock fall iti Kennon Road ket nairikep daytoy manipud kadagiti motorist.
