BAGUIO CITY – Silulukat ti rekord ti Baguio City Police Office (BCPO) para iti panangimbestigar ti Commission on Human Rights iti kaso kontra iti maysa a police-Baguio maatap nga adda pakainaiganna iti panagpukaw ni Jordan Pacion ken nasarakan laengen ti bangkayna sadiay Itogon, Benguet idi May 8.
Impasigurado daytoy ni BCPO City Director PSSupt. Ramil Saculles kagiddan ti bukodda nga imbestigasyon iti nasao a kaso.
Dinakamatna nga awan pay ti naawatna a kopya ti kaso a naipila kontra iti pulis a mapabpabasol iti panagpukaw ti nasao a biktima sadiay Legarda Road iti rabii ti April 26.
Impettengna nga awan ti ilemlemmeng ti BCPO ken silulukatda no maimbestigaran ti mairekreklamo a pulis tapnu malawlawagan ti kaso ken maamuan met ti pulisya ti pudno a motibo dagiti kakadua ti biktima idi inramanda ti nagan ti nasao a pulis.
Kinunana nga inurnong ti BCPO dagiti amin nga statement dagiti testigo iti panagpukaw ti biktima.
Nupay kasta, impetteng ni Saculles nga awan ti nakitada a konkreto a basaran a ti mairekreklamo a pulis ti nangpick-up iti biktima iti deppaar ti Legarda Road sakbay a nasarakan ti bangkay daytoy.
Naamuan nga inaklon met dagiti testigo a kakadua ti biktima a naaddaandan iti engkwentro iti nasao a pulis iti Central Business District gapu iti panakairaman dagitoy iti kaso ti pickpocket.
Dinakamat ti opisyal a saan met nga inlibak ti nasao a pulis a na-engkwentrona ti biktima iti sentro ti siudad ngem saan nga iti aldaw a nagpukaw daytoy.
