BAGUIO CITY – Nabigbigen ti bangkay ti lalaki a nasarakan iti rangkis sadiay Tadiangan, Tuba, Benguet idi agsapa kalman.
Binigbig a mismo daytoy ti asawa ken amana babaen iti bado ken iti tattoo wenno marka iti agabana.
Nupay kasta, kiniddaw ti pamilya ti lalaki a saanen a maiwaragawag ti nagan daytoy.
Maipalagip a narekober dagiti otoridad manipud iti bangkay ti dua a pakete ti mapapati a shabu.
Naamuan met iti inisyal nga imbestigasyon ti pulisya nga adda dagiti pagilasinan a nabekkel ti bangkay a posible a rason iti ipupusayna.
Naipasidong ti lalaki iti otopsiya bayat a naiturong iti PNP Crime Laboratory sadiay Camp Dangwa dagiti pekete ti mapapati a shabu.
Maipalagip nga idi laeng napalabas a bulan ti Marso ket dumanon iti lima a bangkay ti nagsasaruno a nasarakan kadagiti munisipyo ti La Trinidad ken Tuba iti probinsia ti Benguet.
