BAGUIO CITY – Naiyawiden kadagiti probinsiada ti bangkay ti dua a pulis a pimmusay iti panagbettak kabayatan ti fireworks display sadiay munisipyo ti La Paz, Abra idi kanikadua.
Naamuan a naiyawiden sadiay Lubon, Tadian, Mt. Province ti bagi ni PO2 Frenzel Kitoyan bayat a naiyawid met sadiay Vigan, Ilocos Sur ti bagi ni PO3 Carlos Bacali Bocaig.
Maipalagip a ti dua ket agpada a miembro ti Provincial Mobile Force Company ti Abra Provincial Police Office a karaman iti contingent a nai-deploy iti nasao a disso ken naamuan a ni PO3 Bocaig ket maysa a survivor iti Mamasapano Massacre.
Nakaawat met iti cash assistance ti pamilya dagitoy iti sag-P71,000 babaen keni Cordillera PNP Regional Director PCSupt. Edward Caranza.
Kabayatanna, nakaawat met iti sag-P20,000 ti dua pay a pulis a nadangran a da PSI Apdilon Galong nga Acting Chief of Police ti La Paz PNP ken PO2 Richard Basiag ti Danglas PNP
Manamnama a manayonan dagiti nasao a gatad iti kanito a makompleto ti pamilyada dagiti dokumento dagitoy.
