BAGUIO CITY – Agtultuloy ti panagapela iti kararag ti maysa a kailian a soldado tapnu marekoberen ti bangkay ti kabsatna met laeng a soldado a nabati iti killing zone ti terorista a grupo sadiay Marawi City.
Segun kenni Corporal Romnick Estacio, marigatan dagiti soldado a mang-ala iti bangkay ti kabsatna ken iti dua pay a kameng ti tropa ti gobyerno a pimmusay kabayatan ti rinnupak.
Kinunana a tarigagaynan a marekober kuma ti bangkay ti kabsatna a ni Private First Class Jethro Estacio tapnu iyawidna a mismo daytoy iti balayda sadiay Rosario, La Union.
Dinakamatna a talloda nga agkakabsat a soldado a naipatulod sadiay Marawi City ngem nagduduma laeng ti battalion dagitoy.
Imbinglayna a nagtutulagda nga agkakabsat a nu malpas ti riribok iti nasao a siudad ket maaddaanda iti reunion ngem iti saan a nanamnama a pagteng ket pimmusay iti gubat ti kabsatna.
Kinunana nga estudyante pay laeng iti scout ranger course ti kabsatna ken kayatna met laeng ti agawid ngem daksanggasat ta nairaman daytoy kadagiti pimmusay iti nasao a riribok.
Ni Corporal Estacio ket tubo ti Ifugao ken La Union, walo a tawennan iti serbisyo iti Philippine Marines, ti asawana ket maysa met laeng a soldado, ken addaanda iti dua nga anak.
Rambakan met kuma ni PFC Estacio ti maikaduapulo ket lima a kasangay daytoy inton Disyembre 13.
