BAGUIO CITY – Nabigbigen ti bangkay ti lalaki a nasarakan idi kanikadua iti Picnic Groove sadiay Jose Abad Santos Drive, siudad ti Baguio.
Binigbig dagiti gagayyemna ti biktima a ni Dante del Rosario, 20 anyos, tubo ti Alaminos, Pangasinan.
Naamuan a sigud a balud ti biktima gapu iti kaso daytoy a panagtakaw.
Maipalagip a nasarakan ti maysa a jogger ti biktima ken iti panagresponde ti pulisya ket nasarakanda ti red bag a naglaon iti yellow coin purse, maysa nga electrical tape ken bassit a transparent sachet a naglaon iti maatap a marijuana leaves iti biktima.
Maibasar iti otopsiya nga impatungpal ni PSupt. Jaime Rodrigo Leal, medico legal officer ti SOCO, ti biktima ket addaan bagsol iti kannigid a barukong daytoy ken adda ti lemma iti tingged daytoy a mangipasimudaag a posible a nabekkel wenno naibitin ti biktima.
Adda met laeng ti lemma iti pungwapungwan ti biktima a mangipakpakita a naitali ti imana daytoy.
