BAGUIO CITY – Agtultuloy ti panangberipikar dagiti otoridad iti pakabigbigan dagiti tallo nga armado a lallaki a maatap a kameng ti maysa a robbery hold-up/carnapping group a bin-ig a pimmusay kalpasan ti panakipinnaltogda kadagiti pulis iti deppaar ti Lamut-Shilan Road sadiay La Trinidad, Benguet idi kalman.
Iti kaudian a progress report ti pulisya, naala manipud iti umuna a bangkay a nakasuot ti white sweatshirt ken jogging pant ti maysa a keypad cellphone, wallet a naglaon ti rider card ti mannagan Michael Loreto ken dua nga official receipts manipud LTO ken maysa a Traffic Citation Ticket a bin-ig a nakanagan kenni Marvin Velasco Almeida.
Naala met iti maikadua a bangkay a nakasuot ti light brown jacket, gray shirt ken faded black maong pants ti maysa a wallet a naglaon ti nagduduma nga ID cards ti mannagan Bart Maria Nino Punu Bartolo ken sumagmamano pay a cards ken nagduduma nga official receipts a nakanagan iti nagduduma nga indibidual.
Sigun iti pulisya, karuprupa ti maikadua a bangkay ti rupa kadagiti ID cards a nakanagan kenni Bartolo.
Naala met iti maikatlo a bangkay ti maysa a keypad cellphone ken maysa a folding knife.
Iti panagsukimat dagiti otoridad iti subject vehicle, naala ditoy ti maysa nga sling bag a naglaon ti dua nga STL ID cards ken maysa a partylist group ID card ti managan Rolando Mendoza ken sumagmamano nga ID pictures a karuprupa ti maikatlo a bangkay.
Naala pay iti uneg ti lugan ti nagduduma a kagawaan, bado, dua a plaka ken maysa nga envelope a naglaon ti nagduduma ken napapateg a dokumento a nakanagan iti nagduduma a tattao.
Iti agdama, addan iti Metropolitan Funeral Home ditoy Baguio City ti dua kadagiti bangkay bayat a ti dead on arrival iti pagagasan ket adda paylaeng iti morgue ti Benguet General Hospital.
Naipasidong metten iti ballistic examination ti tallo a caliber 45 pistol a nakumpiskar manipud kadagiti napapatay a suspek.
