[photo credit to the owner]
BAGUIO CITY – Nagtalinaed a 22 ti bilang dagiti nailista a biktima ti paputok ditoy rehion Cordillera.
Sigun kenni Clark Dizon, Nurse IV ken Emergency Coordinator ti Department of Health-Cordillera, naikkat iti listaan ti maysa nga indibidual manipud probinsia ti Benguet ngem nainayon met ti maysa a biktima manipud sadiay Apayao.
Impalawagana a saan a maibilang a firecracker-related injury ti napasamak iti nasao a taga-Benguet gaputa saan daytoy a direkta a naputukan.
Innayonna a manarimaan paylaeng ti panagrikos dagiti kameng ti ahensia iti nagduduma a pagagasan ditoy rehion tapnu ammuenda no adda dagiti agpatpataming a biktima ti paputok a saan paylaeng a naireport kadakuada.
Naamuan nga agleppas ti opisyal a panagmonitor dagitoy inton bigat, aldaw ti Biyernes kadagiti nagbalin a biktima ti paputok iti napalabas a holiday season.
