BAGUIO CITY – Ngimmato ti bilang dagiti nabiktima iti paputok iti entero a rehion Cordillera kas maibasar iti kaudian a panagmonitor ti Department of Health (DOH) kadagiti nagduduma a health facilities iti rehion.
Sigun kenni Clark Dizon, Nurse V ken Emergency Management Coordinator ti DOH-Cordillera, manipud December 21, 2017 agingga idi kalman, January 4, 2018 ket dumanonen iti 25 ti nailistada a firecracker-related injuries.
Kinunana nga agtawen dagiti biktima iti 6 agingga 58 bayat a 23 ti lallaki ken 2 ti babbae ken maysa kadagitoy ti agtaltalinaed iti pagagasan.
Innayonna a ti piccolo ti kangrunaan a naaramat a paputok iti panakadangran dagiti biktima.
Dinakamatna a dua ti kaso sadiay Ifugao, maysa sadiay Mt. Province, tallo ditoy siudad ti Baguio, uppat sadiay kalinga ken sag-lima ti Benguet, Abra ken Apayao.
Naragsakanda met gaputa awan kadagiti nagbalin a biktima ti natay ken naputdan ti aniaman a paset iti bagi dagitoy.
Nagleppasen idi rabii ti panagmonitor ti ahensia kadagiti mailista a firecracker-related injuries iti panaglabas ti holiday season.
