BAGUIO CITY – Nanayonan manen iti dua ti bilang dagiti pimmusay iti panaka-aksidente ti parapasahero a jeep sadiay Suello Village, Baguio City idi kalman a nagluganan dagiti volunteer campaigners ti maysa a kandidato iti kinakongresista ti siudad.
Nabigbig dagiti dead on the spot a da Julia Labi, Elizabeth Panis ken Rechilda Abaigar bayat a pimmusay bayat a matamtaming da Adelina Agsaway, Josephine Ag-a ken John Rey Passi.
Agtaltalinaed met iti pagagasan ti 14 kadagiti nadangran bayat a tallo ti nakaruar iti pagagasan idi kalman ken tallo idi agsapa.
Sigun iti pulisya, paturong kuma sadiay San Carlos Heights, Irisan ti jeep tapnu agkampanya dagiti pasahero idi napasamak ti insidente.
Naamuan a saan a nakontrol ti driver ti preno ti lugan idi nakadtengda idi pasalog a paset ti kalsada a nagresulta tapnu maidungpar ti lugan iti concrete barrier agingga a natumba daytoy.
Kinumpirmar met ti pulisya a loose break ti rason iti aksidente a nakairamanan dagiti 24 a pasahero, pakairamanan ti driver.
Idi agsapa ket naisayangkat ti ‘daw-es’ wenno cleansing ritual iti nakapasamakan ti insidente tapnu saanen a maulit ti nasao nga insidente.
Impeksa met ti kampo ti maseknan a kandidato nga aksidente ti napasamak ken awan ti nangayat a mapasamak daytoy.
Inkarida nga ibaklayda ti amin a responsibilidad ken ti gastos kas iti medical expenses dagiti nadangran ken ti burial expenses dagiti pimmusay.
Inkarida pay nga aramidenda ti amin tapnu matulongan dagiti pamilya dagiti pimmusay a volunteer campaigners.
Kinuna ti grupo a saan met a ti napasamak ti lapped tapnu ituloyda ti agkampanya gaputa kangrunaan a puntiryada ti mangabak.
Inyapela pay ti kampo ti nasao a kandidato ti saan a panangpulitika dagiti kalabanna iti nasao nga insidente tapnu laeng dadaelen ti naganna ken ti grupoda.
