BAGUIO CITY – Nagleppas iti maikawalo a puesto ti rehion Cordillera manipud kadagiti sangapulo ket pito a rehion a nagbabalubal iti 2017 National Private Schools Athletics Association (PRISAA) a naangay sadiay Iba, Zambales.
Segun kenni PRISAA – Cordillera President Engr. Alec Mapalo, nakagun-od ti rehion Cordillera iti sangapulo ket lima a gold medals, duapulo ket pito a silver medals ken limapulo ket tallo a bronze medals.
Maipalagip a dumanon iti 192 nga atleta ti nagturong sadiay Zambales para iti nasao a kompetisyon.
Dagiti nasao nga atleta ket nagtaud iti University of the Cordilleras, University of Baguio, King’s College of the Philippines, Baguio College of Technology ken Baguio Central University.
Immunan a kinuna ni Mapalo a bassit laeng ti bilang dagiti atleta a nakipaset iti nasao a pasalip gaputa naigiddan ti PRISAA iti Palarong Pambansa 2017 a maang-angay met sadiay Antique.
Nagun-od met ti Western Visayas ti umuna a puesto, maikadua ti Central Visayas, ken maikatlo ti Negros Island Region.